Taammanaa Bitimaa*

Isa kuffifamee lafarra ciisu
Silaa tolaan jarri isan-dhiisuu
Bakka itti-kufee olkaasee
Sansalata irraa babbaasee
Kan akka ejersaa isa dhaabu
Seerri-saanii-woo isan dhaabuu
Qabsoo-dha maqaan isaa
Gonfachiisaa bilisaa!

Qabsoo-dha maqaan kansaa
Dachee hunda biyyisaa
Keessumaa qabsoo bilisummaa
Kan caccabsee darbatu
Harqoota kan gabrummaa
Isa guutuu taasisu
Nameenya kan namummaa!

Iddootti kufee olkaasee
Kiyyoo mormarraa baasee
Madaasaa irraa haqee
Raammoo isa madaa keessaa
Nyanyaata akka bineensaa
Irraa mimmicirqisee
Nama nama taasisa
Bineensarra olcaalchisa!

Inni nama sanyiin hin qoqqobu
Dabalees amantiin hin qoqqoodu
Aadaan addaan hin baasu
Bifaan gargar hin yaasu
Hunda ija takkaan laala
Cufaaf mirgasaa abbala
Isa abbaan walqixxeessaa
Saboota addunyaa keessaa!

Injiree nurraa micirqisee
Hinjirree nurraa dhidhimsee
Yeeyyilee nurraa bittimsee
Shilmiis saawwanirraa harcaasa
Daanawoos gumbii keessaa baasa
Gabrummaa qabeetoo rarraasa!

Kan Oromoos qabsoo
Kan Kuush kaanis qabsoo
Keessumaa qabsoo sabaa
Kuffifamaa-dha ol-qabaa!

Oromoo, yaa abbilee
Oromiyaa, yaa harmilee
Erga qorichi qabsoo ta’ee
Erga malli tokkummaa ta’ee
Haa qabsoofnu tokko taanee
Hidhannee manaa baanee!

Obbolummaan waltaanee
Hidhannee manaa baanee
Warra Kuushiin waltaanee
Bakka kufnee olkaanee
Imimmaan walirraa haquun
Obbolummaan walolqabuun
Karchallee wajjin diignee
Roorroo walirraa dhiibnee
Hayyee, qabsoo-dhaan galma keenya geenya
Sansalata malee, guyyum tokkollee teenya!

Yaa Oromoo, aadaan-kee bubburree
Ilaa, biyyi-kees sonaan cocorree
Akka nafxanyoota asittis “iskistaa”
Achittis “iskistaa”, mitii sirboonni-kee
Biddeenuma callaasoo, miti nyaanni-kee
Of-tuullummaa fi sanyummaa miti yaanni-kee!

Atoo qaccee Leenjisaa Diigaa-tii
Atoo diroo Elemoo Qilxuu-tii
Eekaa sanyii Taaddoo Birruu-tii
Maarree lammii Abbishee Garbaa-tii
Mataa gadqabachuu
Eessaayyi barattee
Oromo-sodaan beekuu
Kan eessaayyi argattee?

Oromoo uummata kiyya
Uummata-koo uumee tiyya
Yaa safuun guddisa-koo
Abbaa dhugaa lubbuu-too
Atiwoo galaanaa
Jarri maa si dhaana?
Maaf dhaana dirra-kee
Maaf waxala miila-kee?

Ol-ka’i uummata kiyya
Walta’i yaa saba kiyya
Xiqqaa-guddaan waltayii
Alaa-manaa walgayii
Harqoota gabrummaa caccabsi
Sansalata ciccirii darbaddhu
Galma-kee ni geessa abdaddhu!

Ni mootaa, ni mootaa daran abdaddhu
Dhalawwan-kee mara walitti qabaddhu
Sabbata-kee jabeessitii hidhaddhu
Aayyoo ka’ii, siiqqeen joollee-tee labsaddhu
Oromiyaa iyyii, ilmaan Kuush waammaddhu
Mirgaan mancaa qabaddhu
Bitaan wantaa qabaddhu
Oljedhi-kaa waanjoo ofirraa darbaddhu
Biyya biraan qabduu Oromiyaa jaarraddhu!

Barliin, 16. 06. 09

*************   Hubachiisa    **************

* Walaloon kun gaafa 02. 08. 09 Kora Waldaa Qorannoo Oromoo, jechuun kan OSA isa dira Atlaantaa, Biyya Ameerikaa keessatti adeemsifame irratti kan uummataaf dubbifame ture. Silaa barri kun bara qabsoo uummatoota Afrikaa Kaabaa fi Jiddugaleessa Bahaa-tii, kunoo ijoolleen Oromoos, dhaloonni qubee gabroomfattoota Habashaa irratti fincilaa jirtii, mee walaloo kun isaaniif: mararfannoo, rajeeffannoo, jajjabeessii fi bira-dhaabbannoo haa tahu!

__________________________________________________

1. Bishaan yoo nama nyaatu nama kofalchiisatiini.

2. Bishaan lagaa wal hin eegu
3. Bitaan korii mirgaan korii walgeettiin koora dha
4.Wama qalte qalii tirumaan naaf gali jette jaartiin
5. Biyya FARDI hin jirre HARREEN garmaamti/saggaarti
6. Biyya ofiitti Lukkuun korma
7. Sangaan biyya ofiitti  baroodu biyya ambaatti ni mar’ata
8. Biyya abbaa kootiiiti  jedhee injiraan moluu irratti hafe
9. Boruufuu si’abdadhe bada moluu tiyya jedhee namichi
10. Daa’imaa taphaa sinbiraa lubbu
11. Dallaan abbaa kudhanii yeroon hincufamu( wan wolitti heteffataniif).
12. Dubbiin bay’atteef fardatti hin fe’an
13. Du’a abbaatifi du’a Sangaa ilmi hin jibbu
14. Dhakaan ciisanii darbatan deebi’ee mataa nama dhaha
15. Baredde jedhanii hintala obboleetti hin fuudhan

Bara durii keessa jaartiin Akkoo Manooyyee jedhamtu takka angoo/taayitaa /aargattee turte. Angoo isii kanaan wonta ajaa’ibaa raawwataa/hojjataa turte. Yeroo  angoo irra jirtutti akkoon mannoyyee turte tarkaanfii asii gaditti ibsamaan tartiibaan ummata ishee irratti fudhatte:

Jalqaba namoota gabaabaa lafarraa fixaa jettee murtii labsite. Akka yaada akkoo mannoyyeetti namoonni gabaaboon qaroodha.  Yeroo adda addaatti yeroo isiin ajaja adda adaa ummatni akka raawwatan barbaaddu, namoonni gaggabaaboon ni mormuun. Dubbiin isaan injifachu hin dandeenne. Kanaaf dubbiin isii akka nammoota qaroo kanaan akka jalaa hin fashaleefi. Walumaagalatti nama isii mormu waan hinbarbaanneef murtii kana fudhattee. Battaluma sanatti jaarsi gabaabaan tokko , “ mee waan isinii toluuf qabaa boolla keessatti nadhoysaa nahanbisaa jedhee.”  namootta ajaja akkoo mannooyyee hojii irra oolchuutti jiran gaafatte. Isaanis tolee jedhanii jaarsa kana osoo hin ajjeesin hambisan.

Erga namoota na morman ykn yaada kiyya afoo dhabbachuu dandan’an (namoota gaggabaaboo) jettee amantu erga ajjesisiiftee raawwattee booda , ajaja jajjaboo enyuuyeroo sanatti  fala itti argachuu hin dandeenne dabarsuu eegalte.

Ajajinni isa duraa:  lafaa fi samii jiddutti mana naaf ijaaraa jettee ajajje. Namoonnis dubbin kun waan isaan rakkiseef fala dhabanii jennaan jarsa gabaabaa na’awwaalaa jedhe san bira dhaqanii furmaata gaafatan. Jaarsichi dubbiin geette itti yaadde fala gabaabaa namoota isa gaafataniitti hime. “Akka jettaniin, nuti mana siif ijaarraa garuu dhoqqee abbatu buufataa ati buufadhu”  jedhaanii jedhe. Namootni akkoo mannooyyeetti deebi’anii deebi’anii  akkumma jaarsi gabaabaan jedhe jedhanii itti himanii jennaan namni gabaabaan hafee jira jette.

Ajajinni isa lammaffaa: mana ani keessa galu kana usoo asii hin sochoosin balbala isaa kana gara gaaraatti laalchisaa naa baasaa jette, isaanis akkuma duraa san jaarsa gabaabaa  bira deemanii furmaata gaafatan.  Jaarsi akkana jedheen  deebiseef  “yoo isiin rafte balbala mana isii kan duraa cufaattii kan biraa gara gaaraa laalchisaa banaafii jedhe.

Kana booda hifattee jennaan akkana jette “wonta fardaa gadii kan harree olii naa fidaa nayaabbisaa” jette ajaja dabarsite. Toleekaa jedhanii harree-diidoo fidaniifii yaabisanii irraatti hidhanii gad dhiisan,kana booda harreen fuutee halayyaa irraa gattee akkoo mannooyyee achitti hambifte jedhama.

- Abdii Borii Irraa

Imagining the Reign of Akkoo Manooyee

Once upon a time said a pro-feminine story teller, women were the rulers of Kuusaa (Kush) land. A dynasty of women known as Candace with its capital at Merowe was well known throughout Africa and the world of that period. War, famine and internal strife forced a segment of the people of Kuusaa to migrate southward. The people of Ilmoo Ormaa (Oromoo) were the largest group of that segment. It was this group that transformed itself from centralized monarchical system to democratic Gadaa one.

All political offices continued to be led by woman as in Merowe tradition. Other jobs were occupied by competition of citizens irrespective of gender. Then every thing was in abundance. Draught never threatened them for they had kept reserves of grain enough for years and had also dug several tulaa (water wells).

Women led every unit from family to nation. At all levels they imposed strict discipline of work. Laziness was not tolerated. Their aim was to create a passionate and hard working society in the image of women. Training of children started from babyhood. Every eight years there were initiation to higher levels. Every thing was set for eight years. Training included cattle herding, history, horse riding, military science, public administration etc. A Gadaa stays in power only for eight years.

Read the Full Story (Imagining the Reign of Akkoo Manooyee)

-10-

Ka jiruun itti tolte, ilmi Gabra Xaadiq, Lammaan akka barbaade dubbata.  Nama wol gahii irrattis ta’ee bakka biraatti isa dura dhaabate “eennu akka taate wol beenna” jedhee sodaachisa. Namoota karaa isaatiin qabamanii dhabaman “anatu qabsiise” jedhe dubbachuu irraa waan hafe waan dhoffatu hin qabu. Deeggartoota ABO arrabsuu yoo barbaade jecha dur irraa itti fayyadamu qaba. “ABOn eegee lootuuti! Qaama dabaree, ka gatii hin qabne!” jedha. Bakka tana dura ture, woltajjii bartoota wolitti qaban tokko irratti, inni jecha kana dubbannaan barataan tokko ol ka’ee, “eegeen lootuu akkuma jettan qaama dabaree ka gatii hin qabne ta’uu dandeetti. Garuu yoo muramte deebitee bahuun isii waan hin hafne ta’uun akkuma jirutti ta’ee, isin qaama dabaree ka gatii hin qabne kana sodaattanii waanuma isaa qaaquun maaliif? Ammallee lootuun duutu malee eegeen sun biqiluun waan hafu isinitti fakkaataa?” jedhee waan jedhu wollaalchise. Barataa bara san kana isaan jedhe dabalatee, qurxummiileen tana dura bishaan keessaa guursisaa ture heddu, lubbuun jiraachuu fi jiraachuu dhabuu hin beeku. Jiraatanii baatanii ammoo dhimma isaatii miti. Waan sodaatu hin qabu. “Eegee lootuu” jedhee Oromoo arrabsee sodaachisaa, farsoo hambuuqee qasha’aa,  Shaashamannee keessa biqiqa. Baldee taphata. Kolfee fandalali’a.

Jireenni qilleensaa tun ammoo tokko kolfisiiftee yookiin gammachiiftee kaan boochisuu bira tartee kolfa yookiin gammachuu tokkoo booyicha kaanii godhuun qooda isiiti.

Ijoolleen sadiin didiqqoon woyii balbala mana Damboobaatti waan gara garaa wolitti guuranii taphataa woliin qaaqan.

“Hin du’e!” jedhe tokko.

“Hin duunee!” jedhe ka biraa.

“Hin du’e” jedhe kuun ammallee deebi’ee.

“Hin duune”jedhe kuunillee.

“Eeessatti beetta?! Hin du’ee”

“Yoom du’e hin ajjeesan malee”

“Hin du’ee cadhisi!”

“Hin ajjeesanii atuu caldhisi!” jechuudhaan wol morman.

“Atuu cadhisi! Abbaan kiyyaa hin ajjeesan jedheera”

“Cadhisi atuu! Haati tiyya hin du’e hin jennee?” Wol arrabatti taran.

“Cadhisi! Kijibaa!” jedhe ka irra jira fakkaatu.

“Atuu kijibaa!” jedhe kuunillee deebisee.

“Dabeessa mataa kosii!”

“Atuu dabeessa mataa kosii” jedhe kuunille. Wol lolatti taran.

“Anaa dabeessi mataa kosii!? Anaa!?” jedhee itti qajeele ka irra jiru.

“Ee si’i” jedhee ija babaase kuunillee. Namoota lamaan booyaa dhufan woyiittu wol lola ijoollee sanii jidduu baye. Wol lola, dhiisanii namoota booyaa moonaa seenan faana fifiigan. Haga isaan wol mormii irraa wol lolatti taran dhaabatee laalaa ka ture Hayyuunillee, isaan faana fiige. Moonaan mana booyaa booyichaan wolitti bu’e. Maayii irra namni wol obsisiisee dacha’ee taa’eera.

“Mee reeffa akkamitti argitan!”jedhe namoota haarawa dhufan keessaa tokko. Jaarsa woyiiti.

“Worruma waajjira poolisaattu fe’ee fide” jedhe namni ka’imoomatu, ka gaabii uffatee battala taa’u.

“Tolee!” jedhan jaarsi gaafatan afaan qabatanii.

“Manuma nuu fidan!?” jedhe ka odeeffatan.

“Namni waa gaafate jiraa?” jedhan jaarsi waanuma jedhan wollaalanii.

“Maaliif ajjeeftan jedhee woyii moo?” jedhe namni jalaa qabe.

“Bada gurbaa! barri afaan hin beenne afaan nama wollaalchisa. Afaan hin qabuu… afaan nama qabaa caldhisi” jedhan.

Gurbaan sun qoonqa gaddaatiin “ajjeefnee maal taatan! Wonni gootan hin jiru. Yoo dubbattan akkana isin goonaa jechuufii miti ka kana godhan. Kaan afaan qabachiisuuf. Akka sodaatee hin dubbanne godhuuf… ” jennaan namni firaashii afameeru marsee taa’u ija gaddaatiin isa laale. Itti fufe gurbaan sun.

“Akka namoota heddu du’aa jiruu isaanii wollaalchisanii hambisan godhuu hin wollaalle. Sodaa nu keessatti uumanii wolii rifachuu nu dhoogguuf. Namni sodaan keessatti jabaatte onnee jabduu hin qabu. Namni onnee jabduu hin qabne hin aaru. Aarullee uguruu hin gahu. Jarri ammoo karaa kanaan milkaayaniiran. Sodaa nu keessatti uumachuu bira taranii jabeefataniiran. Nu ammoo sodaa nu keessatti uumatan kana uf keessaa baasuun haa hafuu, akkuma sodaaneyyuu ufiif amanuu hin dandeenne. Mee an Waarituun garaa kiyya woliin dhaladhe ‘sii ajjeefnee awwaaladhu yoo naan jedhan maal godhe? Maal ta’e? Waan takkallee! Kana maaltu na godhe? Sodaa na keessatti uuman” jedhee uduu gurbaan aarii gadda makateen itti fufaaru keessummaan dhufte.

——————————————————-

Eega du’a Damboobaa dhageettee torbaan gahaniiran. Keessummaan irraa hin qoorre.

“Xalayaa an barreesse agartee aayyitee?” jedhe mucaan haadha teettee yaadduun. Mucaan kana jennaan bootte Ruufo. Namni mana guutu. Gariin isii woliin booya. Gariin ammoo akka obsitu gorsa. Akkaataa xalayaa itti barreessan qofa uduu hin taane, waan heddu ka abbaan mucaa barsiisaa ture yaadattee cadhisuu dadhabde.

“Kunoo laali” jedhe mucaan, woraqaa woyii qabatee isii boottu bira dhaabatee.

“Hayyee hin laalaa” jettee irraa fuutee akkuma woraqaa san harkatti qabattetti ammallee isa ufitti qabdee bootte. Hennaa san abbaan waan inni barreesse dubbisee “akkas leenca kiyya! Waan an ardha siif ta’u hin agarta!…” jedhee jajee harka dhayaaf ture. Ka ardha haadha irraa eegellee kanuma. Akka xalayaa san dubbiftee ufitti qabdee dhungattee, harka dhoofteefii waan isaaf gootu itti himtu barbaada. Ruufo mucaan dhiisuu dinnaan xalayaa mucaan itti kenne san dubbiftee uduu hin fixin booyichaan manni sun wolitti bu’e.

“Abbaa kiyya akkam jirta? Nagaa jirtaa? An nagaa jira. Aayyoon hin bootti. Yeroo maraa hin bootti. Anillee isii laalee booye. Namnillee hin booya. Namni martinuu hin booya. Birraan yoo woliin taphannu, ‘abbaa kee hin ajjeesan’ naan jedhe. Boonaan ammoo ‘hin du’e malee yoom ajjeesan?’ jedhee Birraan wol lolan. Ati maaliif nama si ajjeese san ufirraa hin dhayin. An si hin jaaladhu. Ati qara maaliif hin gala jettee galuu didde.  Ati qara maaliif na jalaa duute? Haga fuula nagayaatiin wol agarrutti nagayatti.

Ilma kee Hayyuu irraa” jedha xalayaan Hayyuun abbaa isaatiif barreesse.

********  *********  ********

—–Xumurame—-

-9-

Jireenna keessatti jaarsa yookiin jaartii qabaachuun waan diqqaa miti. Jaarsa yookiin jaartii wolii galteen jiraatan ta’uun ammoo waan guddaa dha. Worri wolii galteen jiraatu, yoo dirqamaan fooyamu ammoo nama marara. Lafti ganama. Ruufo balbala irra caamtuu ganamaa keessa teettee boqoo qabattee yaaddi. Hagam ture jaarsi isii ka bahee dhabame? Sambanni ardha baatii lama. Jireenni isaanii baldhoo bira tarte ta’uu baattus ballaa akka ardhaa hin turre. Jireenni ballaan hin hokkolti. Ta Ruufo keessa jirtu ammoo, ballattee hin hokkolle. Harkaa jaamte.

“Rabbiin kun ilmoo namaa tana maalumaaf bineensa wolitti godhe?… Badii wolii keessa gammachuu barbaaddii?… Haga wol miitutti jiraachuu hin dandeettuu?… Haga mana wolii diiddutti ka ufii ijaarachuu hin dandeettuu? Worri isa qabee dhabamsiise hagam gammadeera laata?… Waan deebii hin qabne heddu uf gaafatee booyaa turtee, bakkuma teette sanitti mogolee isii ta shookalliteertu gan’aan gad haxoofnaan taan caalaa daarofte.

“Nama jaalataniin adda bahuu caalaa wonni nama miidhu maaluma?” jette ammallee, eega gan’atti tuttufattee mogolee daarofte haxaayatteen maayii. Nama karra moonaa dhadhayetu yaada keessa jirtu jidduu bahe.

“Anaa dhufu adaado!” jettee nama seene reebbattee, dhungatte. “An haa badu! Karaa haa taru an! Bahee haa dhabamu an Damboobaa kiyya!” jedhan jaartiin, moonaa seenan eega irra deebi’anii dhungatanii ka’anii booyaa. Ruufollee imimmaan jissite. Wolumatti booyaa, “koottu adaadoo tiyya” jettee, gara manaa jalaa qajeelte Ruufo. Waan feestaaliin harkaa qaban woyii lafa kaayatanii, “mee alanuma teennaa?” jedhanii, bakkuma isiin taa’aa turte jaartiin gaf jennaan “mana seeni adaadoo tiyya!” jetteen imimmaan haqataa. Jaartiin hin seenne.

“Yoom dhufte adaadoo tiyya?” jette isiinillee dhuftee isii bira gaf jettee.

“Kaleessuma galgala” jedhan jaartiinillee, imimmaan haqataa.

“Maaliif na bira hin bulin ree?”

“Ruufa tiyya kutubii dhufne. Nama na fidullee hin argine… Ati ufii nagayumaa? Coraan si fayyaa?”

“Nagawuma…? teessan nagayaa?” jette Ruufollee deebiftee.

“Guutuu afina! Galanni isa haa gayuu”

“Qe’ee teenna quba qabdanii?” jette eega nagaya wol gafatanii ka’anii.

“Miila kana quba hin qabnu. Ammoo gurroon nagayumaa… daa’imni kee hoo?”

“Hin rafaara”

“Atta jira bada mucattii?” jedhan guftaa jalaa furate, shaashiin duubatti hidhataa. Rifeensi mataa bule; wol makaa adii fi gurraachaa.

“Mee bada mucattii hafuuruma Damboobaa?” jedhan, jaartiin qoonqa gaqqabatanii. Siyaasa biraa beekuu baatanillee, barri bara sodaataa dubbatan ta’uu sirritti beekan fakkaata. Kana ka godhu ammoo jaartii san qofaa miti. Ka siyaasa beekullee kanuma. Namni Ruufoon dubbisu martuu, eega Damboobaan dhabamee akkanumatti kanuma jedhaan. Gara jirutu wollaalame malee, manaa bahee karaa manatti deebi’uun wollaalee akka hin badin ammoo maraa garaan hin beeka. Wonni jechuu danda’u sanuma qofa waan ta’eef martuu kana isiin jedha.

“Homaa hin jiran adaadoo tiyya. Anillee isinuma!” jette.

“Waarituun eessa jira?”  “Shaggar jira?” “Maal achii godha?”

“Hin barata”   “Dhagayee inni?”

“Dhagayee maal godha adaadoo tiyya? Kun waan dhagayanii waa godhanii miti” jette Ruufo.

San dabarsanii waan gaafatan wollaalanii, shaarbii uffataniin afaan qabatanii, “ee dhabami falfala! Ee karaa tari falfala! Aanne’e! An haa badu! Aann’e! aann’e!…” jedhanii ammallee mararfatan. Bakkuma san taa’anii, uduu waan gara garaa qaaqan, Ruufo qoonqa woyii dhageettee lafaa utaalte. Yoo gara manaa ol seentu Hayyutu banee, raadiyoo afaan Amaaraa qaaqu bira dhaabata. Shamizii malee kofoo ufirraa hin qabu.

“Maal godhaarta mucaa?” jetteen.

“Reediyoo caqasaara”jedheen.

“Deem asii! maal ambaa beettaa caqafta!” jette kolfaa dhaxxee reediyoo cufte.

“Caqasu malee” jedhee uduu inni booyu, “beena surree sii godhaa” jettee harkifte.

“An haa badu kurfaa kiyya! mee natti koottu!” jedhaa ufitti waaman jaartiin isii faana ol seenan.

“Kuunno akkotti dhaqi!” jettee gara jaartii akeette Ruufo. Mucaan tole hin jenne. Jaartiin bira dhaqanii, haadhuma jalatti, uduma inni didu, ufitti qabanii booyaa dhungatan. Tana dura akkanatti laalanii hin beekan. Eega dhungatanii ufirraa achi qabanii laalan. Waan tana duraa caalaa obboleessa isaanii maan’aa, ka woliin guddatan, ka jaalatan, ka ardhallee yoo yaadatan booyan abbaa Damboobaa fakkaata.

“An haa badu! laalaa mee Kinniisoo! Muraa albuu isuma!” jedhan.

Ruufo mucaa uffata itti uffiftee, fuula dhixxee daabboo woyii aananiin eega nyaachifteen booda “taphadhu” jettee, gara mana aaraa gabbaate. Mucaanillee bahee gara mana oollaa lixe. Yoo haga ture turee mucaan deebi’u isaan buna dhugan. Mucaan mana keessa eega takkaa fiffiigee ammallee gara raadiyoo qajeele. “Dhiisi!” jetteen haati. Dhiisuu dide. Hin kadhatte. Hin dide. “Lakkii dhiisi Hayyuu!” jettee quba itti mirmirsite. Ammallee hin dhiifne. Fuula itti baddee “lakki ardha gurbaannana” isiin jennaan “yoo akkasitti nama laaltu, ila akka ati jirtu” jedhee, uduu  jarri lachuu kolfan gara alaa gabbahe. Ammallee hin turre. Haati gara mana aaraa gabbaanaan yoosuu deebi’ee raadiyoo san uduma tuttuqu, komadiinoo gubbaa lafaa dhaye. Yoona haati aartee harka isaa keessa dhoofnaan booye. Jaartiin ufitti waamanii sossobuu yaalan. Caldhisuu dide. Amma haati itti tartee sossobuuf ufitti harkifnaan “sin fedhu! sin jaaladhu! Sin jaaladhu! Abbaa kiyya jaaladha!” jedheen booyaa. Ufitti qabdee sossobdullee cadhisuu dide.

“Ana haa dhayu! Lammata si hin dhayu gooftaa kiyya!” jettee shelatte.

“Ee! gaaf tokkollee na dhooftee… sin dhayu naan jette! Ati anuma sobda! Haa galuu abbaan kiyya! Haa galuu itti himadha!” inni jennaan, worri isa sossobaa ture, Ruufoo fi jaartiinillee faana booyan.

*******************************************

-8-

“Na hin darbinaa! Na hin darbinaa! Rabbi sodaadhaa! Hin du’aa! as irraa kufee hin hafuu! Hin hafuu…” jedhee uduma inni worwaatu gamoo dheeraa woyii irraa darbinaan ol utaalee “ufffff… yaa rabbi” jedhee bitaa mirga midhate. Dukkanuma keessa ture, ka homaa itti hin mudhanne san keessa jira. Amma harka mirgaa ka miidhame, ceekuu bitaa irra kaayatee, ganaa harka bitaatiin ciqilee qabatee akkuma rafaa turetti ol jedhee taa’e. Torban dura gaafa “an afaan Oromoo barsiisuu malee waan hojjadhe hin qabu” jedhee, qabanii bahaniin san, namoota uffata poolisaatiin jiran sanniin keessaa tokkoo fi ka gaafii isa gaafataa ture, kutaa meeshaleen toorchii gara garaa jiru woyii seensisanii, shabbeenaa goommaa qabatanii qorqalbii sodaachisuu jalqaban.

“Uduu agartu gamoo irraa si darbina! Yoo barbaachisaa ta’e ammoo lubbuu teetitti taphanna! uduu lubbuun jirtu, qonnee boolla si keenna! Yookiinis tumnee si hin ajjeefnu! Akka hin duune, akka hin jiraanne si goona. HIV hin beettaamii? Dhiiga isaatiin si woraannee akka ati daftee hin duunee fi nagayaan hin jiraanne si taasifna… Garuu uduu kun marti hin taane murteeffadhu!” jedhaniin. Haga kanaa fi ka biraa jedhaniin hin dubbanne. Maal dubbata? San duras waan hojjate dubbatullee ka isa dhagahe hin turre. “Akka na dhagayan waan hin hojjanne hojjadhe jedhaa? Waan hin hojjatin, hojjadhe jedhee, eennuun woliin hojjatte yoo naan jedhan eennuun hima?  Kun ammoo waan hin hafne? Waa himnaan wonni biraa faana dhufuun hin hafu. Wonni an himu kun soba ta’uu yoo hubatan ammoo dhugaallee dubbannaan na hin amanan” ka jedhu ammoo san dura yaadaa ture.

“Hin dubbattuu?” jedheen worra bitaa mirga isaa dhaabatan keessaa tokko.

“An dhugaa jiru isinitti himaa jira. Barsiisuun alatti waan dalage takkallee hin qabu” inni jennaan harka isaa lamaan duubatti hidhanii “eennu woliin hariiroo akka qabdu himta moo hin himtu!?” jedhanii shabbeenuu jalqaban. Ima ciniinnate. Maayiirratti tumaan harkatti laafnaan “hin hafa! Si hin ajjeefnu. Akkanumatti sitti taphanna!” jedhaa, kutaa keessaa baasanitti darbanii biraa lixan. Bakkuma taa’e sanitti waanuma eebjuu keessaa utaalee yaadaa ture. Eebjuu biraa ta eebjotetti tare. Eebjuu san yaadatee aare. Deebi’ee seeqate. Deebi’ee aare ammallee. Barsiisaa wol hin feeneen, ka mana barumsaa tokko woliin turan, ka seenaa barsiisu, ka kutaa keessa dhaabatee uduu barsiisu dhuufuu buux godhe, barsiisaa Xilaayee eessaa fidee akka eebjuun arge hin beenne. Barsiisaan sun, uf tuulaa ol aantummaa Amaaraa ka duriitiif booyu qofa uduu hin taane, gowwaa qubeen afaan Oromoo akka faaydaa hin qabne ijoollee Oromootti himu woyii ture.

Yoo akka inni himuu, afaan Amaaraa dhiisanii afaan ufiitiin barachuun dhiphummaa qofa uduu hin taane wollaalumma. Afaan Oromoo “afaan Oromoo” jedhee hin waamu. “Laatiininyaa” jedha. Jibbaan inni barsiisota afaan kana barsiisaniif qabu irraa mudhata. Kanumaaf jecha Oromoon isa fedhu hin jiru. Damboobaanillee akka namiituu ilaalcha mishaa hin qabuuf. Kanumarraa ka ka’e, gaaf tokko bartoonni barsiisaa kana “akka nu hin barsiifne” jedhanii iyyatan. Waan isaan dhagayaa dhabnaan gaaf kaan, uduma inni barsiisu, riichitiin uchumaan qabsiisanii jala buusan dhooyuu fi barsiisichi sun nahee dhuufuu buux godhuun takka. Barsiisaa santu asitti dhufee “gatii kee argatte! dhiphaa” ka jedhuun eebjuun arge. “Habashaan eebjuunillee nu biraa hafuun heddu!? Gaafa duunellee qabrii nu falmuuf dhuftii laata?” jedhee aaraa turee yaada biraatti tare.

Mana isaatti tokko-tokkoo gaditti, tokkoo ammoo olitti jiraataa ture. Siree mishaa jedhamu ta’uu baatullee ka mana isaatti irra rafaa bahe badaa miti. Uffata badee hin beeku. Hiyyummaa nyaata dhabaatiinillee nama guddatee miti. Haga fuudhellee jireenna barsiisaan tokko jiraatu jiraataa ture. Dukkana san keessa yeroo irra jiru ima taa’a. Yeroo tokko tokko ammoo dhagama ligidaayu san irra huursee rafa. Kokkeen namaa waa hin diddu. Nyaatuma akii sareenuu miilaan baqattu, ka jala buusan san nyaata. Uffatuma irra jiru saniin lafa halkanii guyyaa adda hin beenne san keessa ture.  Ilmi namaa laafatti akka hin duune ka hubate eega tumaa gaafas uf wollaaleen san keessaa deebi’ee as. Dhagaa irra ciisaa ture qofa uduu hin taane, kutaan sunillee ka itti qabbanaaye eega eebjuu san keessaa dammaqee taa’ee as.

“Mana kiyyatti uduu haala akkanaa keessa jiraadhee hagana bulaa laata?” ufiin jedhe.

San dura, haala akkasii keessa ilmi namaa jiraachuu akka danda’u kitaabaan dubbise. Ufii isaatii haga arge ammoo reef torbaan lama jira. Jijjiiramni hin turre. Kutama san keessatti torbaanota dabalate.

Achii asillee harka lamaa sadi, kutama san seensisanii tumaniiran. Tumaan maayii garuu akka gaaf duraa laafaa hin turre. Qaama irratti hadoochanii, gurra duuchaniiran. Funuunsaniiranii laamshessaniiran. Ol ka’ee dhaabachuu hin danda’u. Lafti marteenii gubbaa gara galuu yoo uf hubate gattaa’a. Gogaa qofaasisuu ka jalqabe ammoo baatii tokko booda. Yeroo tokko tokko ammoo wonni qofa’ee tufu dhadhamni isaa dhiiga dhiiga itti dhaya. Akkasumatti baatii lama jala gahe. Haga kana mara ta’e guyyaa tokkollee waan mucaa isaa uduu hin yaanne oolee hin beeku. Waanuma mucaa isaa woliin ta’aa ture andisa. Mucaa isaa tolaan dhiisii lolaanillee injifatee hin beeku. Gaaf tokko isa manaa bahaaruun “si woliin deema” mucaan jennaan “taa’i… na faana hin deeminii” jedheen. Mucaan tole hin jenne. Hin loleen. Biraa hafuu dide. Shaxxee fudhatee itti ka’e. “Na dhahi” jedhee itti deeme mucaan. Dhayuu hin dandeenne. Sossobachutti deebi’e.  “Hayyuu kiyya! Adaa na hin jaalattuu!” jedheen. “Si jaaaladha” jedheen mucaan deebisee.

“Na sobaa jirta! Maaliif waan an siin jedhu hin dhageenne ree?” jedheen abbaan.

“Atuu na hin jaalattu” jedhe mucaanillee deebisee.

“Maaliif?” jedheen abbaan.

“Maaliif waan an siin jedhu didda ree?” jedheen. Bakka amma jirutti yoo taa’uu mitii yoo silim jedhullee isa afoo dhufa. Wonni inni jedhuun gurra isaa irratti qillisa.

“Adaa na hin jaalattu aabbaa kiyya!” jedhaan. Yeroo mucaa isaa yaadatu kamuu garaa jabaachuu dadhabe. Akkuma keessa jiru sanitti akki mucaan isaa itti jiru isa yaachisa. yaadaan faana hiixxata. Dhaqqabuu yoo dhabu ammoo akka daa’imaatti fiqqifatee booya. Yoo yaada mucaa isaa irraa as gara galu ammoo ufiin qaaqa. “Akka garaan dhalaa si godhe hin ta’in kaa! Akka dhiiraa ta’i kaa gurbaa! Duuti akkana fa’atti dhuftii jajjabaadhu! Akka an itti jiru saba kiyya dhiisii worri irraa dhaladhee arguu dhabe jettee garaa uf raaftee maqaa dhiiraa hin balleessin kaa bada gurbaa!” ufiin jedha.

*********************************

-7-

Wonni keessa jiru boolla haata’uu mana, adda hin hubanne. Waan dubbataa dhiisii wonni shokossaallee hin dhagayamu. Kutaa san keessa malumaan yoo deemu dhiphaa dha. Tontoommatte dhadhayee laale. Siidaa rukkuttaa tomtoommuu isaa dhiisii rukuttaa biraatuu liqimsee hambisu. Hundee kutaa mara irra deemee laaluuf uduma naannayu balbala bira gahe. Cufantaa sibiilaa ti. Sibiilli baxxeen waa irra kaayuuf tolu woyii, wolakkaa cufantaa sanii irra jira. Harkaan qabee laalee bira taree naannayee ammallee mare itti deebi’ee, caldhiseetuma uf duuba luka mirgaa fuudhee, ta bitaatiin uduu itti deebi’aaru waa dhiite. Wonni sun ol fuunaan itti ajaaye.

Jarikaanii afaan muraa ka finfaaniif irra taa’an ta’uu beekee gara balbalaa gad siissee kaayee deebi’ee taa’e. Dukkana itti isa darbanii lixan san keessa hagam akka ture hin beeku. Garuu saa’aa kudha lamaa gad akka hin taane bikka. Saa’aa dheeraa kana booda sagalee woyii dhagaye. Miila nama deemuu yookiin socho’uu ta’uu hin wollaalle. Namni socho’u sun waa ibsataa gara balbalaa as dhufe. Balbala kutaa inni jiruu gahee, cufantaa sibiilaa wolakkaa irratti qaawwa diqqoo woyii banee, uduu homaa hin dubbatin, qaawwa san keessaan, sibiila baxxee san irra waa kaayee, gad deebisee cufee yoo lixu hin dhagaya. Akkuma namni sun lixeen dhaqee laale. Nyaata laastikii woraqaa irra kaayameeru woyiiti. Waan saanii san irra jiru qubaan yoo qabu akka buddeenaa woyiillee itti fakkaata.

Fuudhee ulate. Hin onta. Beelayullee lubbuun fuudhuufii didde. Achumatti deebisee dhiise. Ammallee haguma qara turan turanii deebi’an. Namni dhufe akkuma yoo duraa qaawwa san banee uduma hiixxatee nyaata biraa achi kaayaaru, ka inni san dura achitti deebise qaarisee, ka biraa kaayee lixe. Yoona akka yeroo duraatii miti. Beelayeera. Dadhabeeralle. Nyaata achi kaayame san, bakkuma san dhaabatee, irraa kukkutatee malumaan jarikaanii san keessatti darbee as deebi’ee taa’e. Dukkana keessatti ijji hin barbaadamtu. Sammuun namaa waan ijji yoo ifaa keessa jirtu mudhiftu caalaa guddisee namatti agarsiisa. Maal fa’a yaada? Maal fa’a hin yaanne. Akkaataan qabama isaa, waa’een maatii isaa, sababa isa qabaniif, waa’een Oromoo, waa’een barumsa isaa ka eebbifamuuf deemuu, Hiriyyoota isaa, bartoota isaa, waan keessa tare mara. Maruma irra ammoo ka gurratti isa qillisu waa’ee daa’ima isaati. Yoo isa woliin taphatu, gaafii fi qaaqa isaa…

Hin turre. Waan shokossu dhagayee yaada keessaa deebi’e.

Qoonqaa fi kottee namaati. Rifatee ol jedhee gurra qeense. Nama tokkoo ol. Qoonqa malee wonni qaaqan hin dhagayamu. Ni deeman. Ni dhufaaran. Ni dhihaatan. Ni cadhisan. Kotteen tokkoo dhufee balbala gahe. Banee baatirii kutaa keessa ol ibse. Ol seene. Baatiricha kutaa san keessa hundaa haga hundaa eega ibseen booda dubbate; qoonqi nama sodaachisu yookiin nama sodaachisuu barbaadu. “Heey! Onaguu” jedhe, baatirii itti qabee. Damboobaa Kinniisoo hin dubbanne. Ammoo ifaa baatirii san jalaan yookiin irraan achi laaluu yaale. Fuula dhiisii miila nama saniituu arguu hin dandeenne. “Ka’i” jedheen qoonqi sun akkuma baatirii fuula isaatti qabetti. Ol ka’e. Bira dhaqee uffata isaa qabee harkisee gara balbalaatiin qajeele. Namticha irreenillee akkuma qoonqa isaati. Bakka jiru san keessaa yoo gadiin bahanillee lafti dukkanuma.

Bakki sun ammallee, ala akka hin taane hin beessisa. Lafti ammallee guyyaa taatee halkan adda hin beenne. Namtichi akkuma uffata isaa qabetti harkisaa qajeeleen. Kooridara woyii jidduu hagatuu deemanii kutaa woyii seenan. Kutaan baldhaa miti. Dhiphaa badaallee miti. Ibsaan kutaa keessa jiru hanga’e ifa. Namni uffata loltuutiin jiru, ka gullateeru, ka fuulaan balbala laalee barcumaa afaan balbalaa jiru irra taa’u woyii isaan ol seennaan qajeelee taa’e. Fuulli guutuun guututti hin muldhatu. Barcumaaleen lamaan woyii ammoo nama san afoo jiran. Minjaala gabaabaa woyii irraa wonni muldhatu gongaa silkii gurraacha woyii qofa. Isa duubaa barcumaa tokkicha woyiittu jira. Namni fidee, kutaa san isa seensise, “taa’i” jedhee xarapheezaa san duuba taree taa’e. Isallee mataan haguuggu. Uffata loltuutiin jira. Damboobaan nama sanitti fuulaan gara galee taa’e. Daarayee shookalleera. Uffata qofaan jira. Lutti qulla.

Gaafa kutaa sanitti isa darban waan ufirraa qabu keessaa wonni irratti hambisan yoo jiraate uffata qofa. Kophee, qabattoo fi sa’aatii yeroon laallatanii mitii, qubeen qubaallee irratti hin hafne. Taa’ee kutaa keessa waan isa afoo jiru laala. Namtichi isa afoo taa’u eega inni seenee jalaa fuudhee haga gubbaa akka isa laalaaru argaa jira. “ABO akkamii agarte laata? Midhaassii laali qofa” jedhaa waan kutaa san keessatti isatti muldhatu laala. Xarraa fi baaxiin kutichaa siidaa dha. Qulqullinna hin qabu. Hin daarayeera. Akkuma isaa. Daaraa uffate san keessaan caldhisee nama isa keessa jiru laala. Hin dubbatu. “Meeqatu uduu inni cadhisee akkasitti laalu maal ta’e laata?” jedhe ammallee garaa isaa keessatti.

Uduu hin turin ammallee namni biraa seene.Kun akka kaawwanii gullatee hin jiru. Uffatallee ka siiviliitiin jira. Mataa ammoo keeppii qaba. Qaamaan qadhinnatti daba. Ka xarapheezaa gabaabaa duuba taree taa’e amma, nama ol seene san jalaa ka’ee barcumaa Damboobaa dalga jiru irra dhufee taa’e. Eega gad taa’ee ijaan Damboobatti goge. Ijji haga woyii gegeetti. “Ye oonag falaasfaa!” jedhe Afaan Amaaraatiin. Jalaa hin dubbanne Damboobaan.

“Hin dubbattuu!” jedheen. Ammallee hin caldhise.

“Siin jedhaa bar! hin boonaartaa?” jedhee ciniinnate.

“Lakki an wonni boonuuf hin jiru” jedhe Damboobaan.

“Ticharii keenna jennee faaruu woliin si haa waamnuu barbaaddee ree?” jedheen.

“An akkas hin jennee…”.

“Amma dubbii haa gabaabsinuu… Waan atis taatee fi waahiloonni kee itti jiran rifeensa mataa irraa haga qeensa miilaatti harkaa qabna. Wanni nu jalaa dhokate hin jiru. Hin dhossa jettus hin dandeettu. Ati eennu ka jedhuu miti ka barbaannu? ABO seeraan ala ta’e, ka mootummaan labsetti maaliif miseensa taatee kaayyoo isaa deemsiftee dha? Maan’ee ABO meeqa akka ijaarte, horii meeqa akka guurtee akka galchite ka akka himtu sirraa barbaannu. Egaa kana adda baasii lafa kaayi” jedhee ija fufurdaa san babaase. Kuuwwan lamaan homaa hin dubbatan.

“Wonni amma naan jettan kun tokkollee kiyyaa miti. An waan ABOtti miseensomee hojjadhe hin qabu” jedhe namni isa amanu akka hin jirre beekullee.

“ABO beettaa?” jedhe namtichi inni kana jennaan.

“Haga namni kamuu beeku!”

“Amma nu sobda moo uf sobda?”jedhe.

“Ufillee… isinillee waan sobuuf hin qabu” jedhe barsiisichi.

“Namni akka keetitti ciigoo barreessee barattoota mootummaa irratti kakaasu miseensa isaa hin taane… isaaf hin hojjanne yoo jedhu namni isa amanu akka hin jirre wollaaluun isaa nama gadisiisa”jedhe.

“An dhugaa jiru dubbadhe malee akka na amantaniifii miti” jedhe. Naasuu fi aariinillee itti hin jirtu. Abdii kutachutu irraa mudhata. Harka maratee taa’a.

“Mana barnootaa keessatti maal bartoota barsiisaa turte?” jedhe namtichi ammallee.

“Waan barsiisaan tokko barsiisu”

“Maal fa’a jettee?”

“Waan barsiisaan kamuu jechuu qabu jedhee”.

“Tolee mee isa waa’ee ABO itti deebinaa… Ciigoo fi sheekkoo fakkeessee bartoota kakaasaa ka ture eennu? Saree fi yayyii jettee ka bartoota ittiin kakaasaa turte sareen eennu? yayyiin eennu? Gooftaa ka jettuun hoo? Ammas qottoo fi muka qottoo jettee ka barsiifte hoo? Qottoon eennu? Mukni hoo? Raammoon galaana keessa deemee isin sodaachise hoo kami? Ati namni waan afaan Oromoo barsiisu fakkeessee bartoota akka ABO ta’an qaru, dabballeen ABO ABOf hin hojjanne yoo jette ka si amanu hin jiru. Nuti diimaa gurraacha kee hin beennu. Hujii kee kana fakkaatuun si beenna, si dhageennas. Ka biraallee heddu siif dabaluu dandeenna. Ammoo hujii kee ‘hin beekan’ jettee sobuu akka hin yaalleef kana mara keessa deemne.

“…Ammoo! nuttillee hujii hin baay’isin. Ufittillee garaa hin jabaatinii waan dalagaa turte tokko tokkon lafa kaayi” jedhaa nyaara guuree, quba itti mirmirse. Hin yaade; Damboobaan. Maal namicha sanitti deebisa.

‘Damboobaa kiyya! anaan kana jechuu dandeetta. Worra waan an jedhe qofatu sirriidha jedhuun ammoo kana jechuu hin dandeettu” ka Ruufoo jetteen gurra isaatti qillise. Waan biraa ka jara saniin jedhu ammoo hin agarre. Waanuma gaafa san Ruufoon jedhe deebisee namticha sanitti dubbate.

“An wonni isinitti himu yoo jiraate Afaan Oromoo barsiiseera. Sanii achi waan hojjadhe hin qabu” inni jennaan, ka isa afoo taa’u lafaa ol utaalee, dhabanaasaa bitaa mirgaa “gamba gamba” itti godhe. Bakkuma taa’etti lafti marteenii barcumaa irra taa’u irraa daaqe. Hin turre. Namtichi gaafii isa gaafataa ture funyaan itti bunnaan, jarri uffata loltuutiin jiran sun bitaa-mirga qabanii bahaniin.

**************************

Guddataa U. Baayyisaa Irraa*

Haadhoo

Yaa Haadhoo

Yaa haadhoo garaa migraa

Tar jette kan naaf baqaqxuu,

Fageenya lafaa gombiftee

Guyyaf halkan wal fuusifte

Daddaftee kan naa qaqqabdu;

Beeloftee ‘naaf quufa hawwaa

Horco’i kee naa darbattu,

Amma ‘llee anaaf raafamta

Lubee na arguuf sardamta

Baduu kiyyatti hinmufattu!
Jaalala onnee ‘rraa maddeen

Lattuu coqorsaa qbattee

Eebbaan martee, na tolchitee;

Beenu, biqilii dagaagi

Qaroomi, baraan daraari

Namoomi diina ‘rra aani,

Beekaa ta’i, beekkumsa dhaali

Hiyyummaa cabsi, deegumsa dhaani

Taliili, lammi gaachani,

Qaamaan tuuji, sammuun guuli

Humna argadhu, malaan buli

Milkaawi, nagaan nuu gali;

Jette hawwii dhaan naqamtee
Boruu kiyyaan harra furuf

Adeemsa koo hofkalchitee;

Awwaali handhuura keenyaa

Osoo biyyen ‘saa ‘ndiigamin

Jifuun na simachuuf maltee,

“Barri indarba”, obsi onnee

Haadhoon koo naa dhufaa jiraa

Jettee Hmilee soorattee

Goota huursu gurra dhahaa

Dhara goobe irraa bahaa

Abdiin guyyaa lakkaawwattee;

Of kennitee, deegdee kuftee
Nyaattuu namaan soddoomamtee

Abummaa qe’ee saamamtee,

Roorroo bafkattee alagaatiin

Miidhamtee, qaamni si cite

Irkoo dheebottee, gubattee;

Utubaan ulfinaa kufee

Golli abbaa warraa tuufee

Hadhaa salphinaa unattee;

Aariin qaama si waxalaa

“Yeroon geese” maalo haadhoo

Jettee yommuu natt’ iyyattu,

Akka umaa ganamaa san

Akka gara-laafummaa kee

Mararfataa haadhoo eegdee

Yoo ciniinattee miixattu;
An’ mee ammas nan daaddisaa

Siileffamee lubuu dhiisi

Amman gawu sanaa hanqadhee,

Yaadaan bututee, raata’ee

Of dhiphisee, burjaaja’ee

Bilisummaa kiyyoon hudhe;

Beektaa …

Qalbiin na baddee jonja’een

Bitaaf mirgatti kiphee bu’een

Teegoftuu waliin roorrisaa,

Isa cabu burkuteesseen

Isa ‘mmoo cime rarraaseen

Dukkanaan ifa doorsisa,

Darsa qaanii itti mare

Koo soqolee yoon xiqqeessu

Sagaleen kiyya ‘nbookisa;

Dhimma kee of harkaa ‘nqabu

Egeree keenya irraanfadhee

Ana jiruut na gidiraa,

Waa jedhe yoon waa argadhe

Sossobadhee waa qicadhe

Gammachuu dhaanan kirkira;

Gurmuu ummataa, ijaarsa lammiif

Seera tumuuf, sirne utubuuf

Yoom sammuun kiyya dhiphataa,

Dhara gaanse, jibba rimsee

Safuu cabsee, qaani goobsee

Lugna aangessuuf miriixata;

Yaa haadhoo!

Maal naa qabda, mee naaf himi

Akkamiin na waldhaanattaa

Ana haadhoo laguu ‘nqabne,

Du’aaf midhaa kee osoon arguu

Conqolaate yoo qorritu

Onneen xiiqiin nanrommine!

Na lagachuuf qaaneffattee

Obolummaa qanansiisaa

Gaddaan dhibamtee hinsiqiqin,

Karaa ‘rraa dabee gatantaraa

Dhugaaf dhara waliin maraa

Tirachuun koo si ‘nmiliqin,

Ija kiyya keessa na ilaali

Halbaadhummaa kiyya abaari

Saalfiin seeqxee naa ‘nbiddiiqin;

Namummaaf wabi akkan dhaaphu

Sirreessi nattotolfadhu

Qeeqa kee na unachiisi,

Qarooma kee natti biifi

Bitaaf mirgaa na to’adhu

Keessa kee na qubachiisi;

Qarooma kee natti biifi

Bitaaf mirgaa na to’adhu

Keessa kee na qubachiisi;

May, 2011

Guddataa Irraa*

Elmataan kan kaloo seeru

Daangesse kottee ‘rraa ittisee,

Looniif tolee ardiis tolchee

Boqachiisee balaa ’rraa oolchee

Bara baraan quubsee tiksee;

Elmataan saawwaniin boona

Coraaf hormaa saanii baree,

Aduuf rooba irraa qolatee

Sossobee waliin foolatee

Ciibsaaf dhoqqee jalaa haree;

Elmataan obboroo ’nciisu

Galgala barfateet galaa,

Malkaa daakee laga cehee

Saawwan saa waliin bobbayee

Horsiifachuuf mala falaa;

Elmataan ollaa ‘nlagatu

Lafee walumaan bulfataa,

Dhangaa mi’aawaa kuta’tee

Itt’ unatee dhamdhamatee

Dhugaa kennee kaan fudhataa;

Dhibdeen elmataa baranee

Xireeffattuu gannaaf bonaa,

Roobnis caamnis kan dhukubsu

Gaadisni lammi kan bulluqsu

Watwaattu hanqiftuu seenaa;

Baranee hunda tuffachaa

Cubuuf hammeenya kuufattu,

Kosii alagaa qulqulleessaa

Borii sanyii unkuteessaa

Of cabsuun bu’aa buufattu;

Baranee barri uddeellatee

Qomoo cabsee saggaarsisu,

Dhuka jabinaa keessaa xuuxee

Dhidhiitessee hidda muuxee

Sammuu baqsee halaaksisu;

Baranee yerootu uumaa

Kan obbaafachiisus yerumaa;

Yeroo?
Yeroo yaa gameetittii
Waan si hima bayeettitti!

Haabaqiif callaa saccaatee
Inqaacii kan gongolchitu,
Goggogaa jiistee qajeelchaa
Dheedhii umriin bilcheessitu,
Kan dhokate ifa baaftee
Isa aguuggate saaxiltu,
Fakkeessaa dawoo dhorkitee
Qullaa dhaabde qaanessitu,
Gola dharaa gorroo ’rraa diigdee
Dhugaaf bakka kan maddistu!

Yeroo siff uggum gooftaa koo
Siif galata hunda agarree,
Kakatee isa kakuu nyaatu
Yeroo situ mee hunkuree!

Tufoo inni keesa riphe
Irraa cirtee qulleessitee,
Summii diiggaaf dhibaafatu
Dhangalaaftee goggositee,
Araba dheeraa qaanii hinbeekne
Qimixxee ‘rraa gabaabsitee,

Safuu cabsee isa foolatu
Fedhiif lammii gurguratu,
Isa borcee heera busheessu
Gabrummaa ijaaree milkeessu;

Yeroo mullifte galata
Hundi calqabe of gaafachuu,
Soba hundee ‘rraa qancare
Hidda muree obbaafachuuf;
Wal ijaaree waliin sochoo’uf
Bitaaf mirgaa walqabatee,
Ololaan wal dhiibuun hafee
Tokkummaan kaayoo utubatee;
Oromummaa olaanfatee
Injifachuuf akeekkatee,

Seenaa ‘saa malaan qoratee
Lammi lammoomsuuf muratee;
Oromootti dalaa ’jaaruun
Bu’aa dhabuusaa hubatee,

Sinsinniin humna wal cabsuu
Maganee of irraa kutee;

Yeroo nu itichi ammallee

Baranee ’rraa nu baraari

Oromummaan haa lalisu,

Kaayyoon cimee irree argatee

Of ’rraa haa cabsu qanbarrii

Galma ummataa haa ballisu!

Taammanaa Bitimaa Irraa*

Afaan keenya fi aadaa
Seenaa keenya fi gadaa
Dachee teenyasoo aayyoo
Biyya keenyasoo aabboo
Bakka itti-kuffifamanii
Kan olkakaasu
Sansalata gabrummaa
Kan irraa-baasu
Oromummaa, yaa Oromummaa
Gaaddisa keenya kan namummaa! 

Qorra hamaa kan namarraa ittisu
Jara balaa kan namarraa xillisu
Oromummaa, yaa Oromummaa
Bullukkoo keenya kan namummaa!

Harfixoo olaantummaa
Harqoota kan gabrummaa
Salphina gadaantummaa
Qorqalbii jalkaattummaa
Qolee kan namarraa dachaasu
Fonqolchee nam-keessaa kan yaasu
Oromummaa, yaa Oromummaa
Kumala keenya kan namummaa!

Dammaqsee dadammaqsee
Kan hirribaa nama kaasu
Hidhachiisee, Hidhachiisee
Kan gadi nama baasu
Nu tokkoomsee
Sansalata nurraa kan cicciru
Qar-darbatee
Gabrummaa nurraa kan diddiru
Oromummaa, yaa Oromummaa
Asxaa keenya kan namummaa!

Bacoo fi injiraan
Nafa keenyarraa
Shilmii fi dhulaandhula
Sa’a keenyarraa
Saca’ee, sassaca’ee-woo
Kan harcaasu
Daanawoo gumbii keessaa-mmoo
Kan gayyaasu
Oromummaa, yaa Oromummaa
Dhiiga keenya kan namummaa!

Ilaa raammoo-midhaanii
Oobruu keenya keessaa kan gingilchu
Yeeyyii-majaa nu marsani
Tamsaasee, tamsaasee kan figgimsu
Oromummaa, yaa Oromummaa
Fayyisaa keenya kan namummaa!

Warra biraa of-fakkeessu
Kan nurraa hanqisu
Ija-banee nama guutuu
Kan nu taasisu
Biyya keenya bakka
Itti-kufee kan olkaasu
Mirga keenya boolla
Keessaa harkisee kan olbaasu
Oromummaa, yaa Oromummaa
Mallattoo keenya kan biyyummaa!

Keessa keenya keessaa
Xurii gadaantummaa kan haqu
Gubbaa keenya irraa
Kosii jalkaattummaa kan faaqu
Gosaa fi saba walammachiisee
Dhiiraa fi dhalaa walqabachiisee
Biyya guutuu hidhachiisee olkaasee
Hundee gabrummaa sosochoosee raasee
Qabee kan nurraa achi darbatu
Biyyi Gadaa kan isa abdatu
Oromummaa, yaa Oromummaa
Gaachana keenya kan namummaa!

Qawwee caala kan roorrisaa sodaachisu
Saamtuu fi gaadduu kan sonaan ollachiisu
Oromummaa, yaa Oromummaa
Jabeessaa keenya kan jagnummaa!

Abbootii qawwee kan nurraa ittisu
Diina kan nurraa bittimsuu
Miiddhaa qabee kan dhidhimsu
Tokkummaa sabaa kanuuf cimsu
Nagaa biyyaa kanuuf tiksu
Oromummaa, yaa Oromummaa
Abdii keenya kan sabummaa!

Imimmaan dhiigaa
Kan harmeefoo qoorsu
Cancala dhiigsaa
Kan abbileerraa oolchu
Namaa fi sa’allee
Kan badii keessaa baasu
Mukaa fi margallee
Kan giimii keessaa kaasu
Oromummaa, yaa Oromummaa
Qoricha keenya kan fayyummaa!

Sansalata madeessaa
Rammessaa miilaa
Funyoo mormarraa gubaa
Kan akka sibiilaa
Nurraa ciree, cicciree
Kan gamatti darbatu
Eeboo fi wantaa tahee
kan nu cinaa dhaabatu
Oromummaa, yaa Oromummaa
Bakkalcha keenya kan namummaa!

Lafa, lafee Oromoo
Qircaarraa kan hambisu
Biyya, biyyee Oromoo
Gabaarraa kan deebisu
Awwaallan aayyolee
Kaabbaawwan aabbolee
Yeeyyiiwwan baargamaa
Jalaa kan baasu
Majaalee manaa-alaa
Irraa kan yaasu
Oromummaa, yaa Oromummaa
Irkoo sabaas kan namummaa!

Odaarraa dhagaraa ittigamaa
Siiqqeerraa harka isa hamaa
Gadaarraa roorroo dukkanaa
Safuurraa jarreen gubbanaa
Irraa qolee gamatti
Cimsee kan harkisu
Mancaasaa-badiirraa
Isaan kan hambisu
Oromummaa, yaa Oromummaa
Bu’ura keenya kan gamtummaa!

Alaabaa keenya boolla keessaa olbaasee
Shaggarii fi Niiwu-Yoorkiittis rarraasee
Republika Gadaa kan nu gonfachiisu
Jireenya guutuufis kan nu abdachiisu
Oromummaa, ammas yaa Oromummaa
Kallacha Oromiyaa kan bilisummaa
Guca birmadummaa fi kan walabummaa!

Barliin, 05. 05. 11

******************    //    ******************